Mangkamo Puang Matua kumande sanda mammi’
Puramo Tokaubanan tumimbu’ sanda marasa
Mangkamo deata titanan tallu kumande sanda mammi’
Puramo puang tirindu lalikan tumimbu’ sanda marasa
Mangkamo nene’ manganna sangka’ kumande sanda mammi’
Puramo todolo lentenan panikuan tumimbu’ sanda marasa
Mangkamo bongana sukaran aluk kumande sanda mammi’
Puramo patiranna saloso bisara tumimbu’ sanda marasa
Silelemo dikataanni to ma’tau tallu
Tae’mo dipapusa borongna to samba’ batu lalikan
Apa tang latiddukun to unnorongpokomi tama kondo tang sayuanmi
Latorro paria komi lan tangana tondok
La unsung ppataranakpokomi lan malipu’ matari’
Bangunpa laumpasirundunan bulo kedenni tu tang nalandi’ torro to lino
Langanpa lami pasienne’ malawangan ke denni tang nadete’ to tongkon tau mata
Denni mani kapuran pangan tang sirundunan
Denni mani serekan bane’ tang sirundunan
Denni mani pati’na langan tang sirundunan
Denni mani dukkunna api tang sirundunan
Denni mani ira’na bai tang sirundunan
Denni mani seronganna bo’bo’ tang sirundunan
Denni mani pa’dunna manuk tang ponno suka’na
Denni mani pa’dunna bai tangponno suka’na
Denni mani pa’dunna tedong tang ponno suka’na
Bangunpa lamipasilolongan
Langanpa lamipasirundunan
Iatu manuk dipemalaran
Iatu torrona sola indo’na la mitaranak keallo ke bongi anna torro sumenna’
Iatu bai de pemalaran
Iatu torrona sola indo’na la mitaranak keallo ke bongi anna torro sumenna’
Iatu tedong pemalaran
Iatu torrona sola indo’na la mitaranak keallo ke bongi anna torro sumenna’
Iatu bo’bo’ pemalaran
Iatu torrona do alang lamitaranak anna memba’ka’ diringki
Na iatu banne malapu’ ladiambo’ rokko kuli’na padang
Lamitaranak keallo ke bongi anna kendek ma’bungin bungin
Iatu merrena’na ladisorong lako manuk sampe membuya
Iatu aangna ladisorong lako datu matutu
Iatu ballana ladisorong lako asu manglaa tondok
Iatu sesanna deata mamase la dikande kipopamuntu lakitimbu’ kipopamayak
Anna makassa’ kipo bala kollong tumanan bua’
Anna manimpa’ kipokulambu penaa rumanduk pa’maruasan
Angki tangkati’pekan tang kalayoan
Angki tang pennallakan tang pesanisian
Iapi napennallakan napennallakanpi rendenan tedong
Iapi napessanisian napessanisianpi dandanan lampo’
Bura’mokan lindo masakke ammi pi’pikan rupa marendeng
Angki masakke mairi’ marudindin sola nasang
Ki susi to unnuukkunni kalimbuang boba
Kite umpendio’ saruran to pore dadi
Anna kendek allo kendek tua’ki langan bulan langan parayangki
Ungkalo’ tangana langi’ usse’pa’ lindona bulan
Ann tontong diposangka’ te tananan bua’
Masae lako di pa’tulangdanni te osokan pa’ maruasan
Anna tiranda lako ba’bana lembang
Anna memongan lako pentutuan lipu
Belanna aluk napondok tengko Puang Matua lan ba’tangna langi’ manoka lanarotoi bombang
Belanna sangka’ naposangka’ salaga Tokaubanan lan lisu batara tia’ la tu’pe daunna
Tontong nasiosso’I torro tolino
Masae lako nasiturananni to sanda rangka’na
Ra’pak ra’pak Puang
Passakke Deata
0 komentar:
Post a Comment